Қорли кечада "Навбаҳор" Тошкентда "Пахтакор"ни мағлуб этди
Ўзбекистон Суперлигасининг 3-турида Тошкентда ҳақиқий драматик манзара кузатилди: қор ёғиб турган совуқ об-ҳаво, оғир майдон, қаттиқ кураш ва кутилмаган натижа. «Пахтакор» ўз уйида «Навбаҳор»ни қабул қилди, аммо учрашув пойтахтда 31 йилдан кейин илк бор «лочинлар»нинг 2:0 ҳисобидаги ишончли ғалабаси билан якунланди.
Баҳснинг биринчи бўлимида жамоалар эҳтиёткор ҳаракат қилди. Қорли шароитда тўпни назорат қилиш ҳам, тезлик билан ҳужум қуриш ҳам осон эмас эди. «Пахтакор» анъанавий равишда ўйин темпини ушлаб туришга уринди, «Навбаҳор» эса интизомли ҳимоя ва тезкор ўтишлар орқали имконият излади.
Танаффусдан кейин вазият кескин ўзгарди. 47-дақиқада Катулонди Кати ўзининг аниқ ва ўйланган зарбаси билан ҳисобни очди — 0:1. Шу гол “лочинлар”га ишонч қўшди, «шерлар»ни эса ҳужумда таваккалга мажбур қилди.
Беллашув тақдирига 65-дақиқадаги пенальти ҳам катта таъсир кўрсатди. Русланбек Жиянов жамоаси учун жазони совуққонлик билан аниқ бажариб, ҳисобни 0:2 кўринишига келтирди. Шу лаҳзадан кейин «Навбаҳор» ўйинни назорат остида ушлаб, натижани охиригача етказа олди.
Бу ғалаба орқали Темур Кападзе жамоаси очколари сонини 6 тага етказди. Қизиқ томони, «Пахтакор» ҳисобида ҳам ҳозирча шунча очко бор — яъни турнир кураши янада қизиқ тус оляпти.
Суперлига. 3-тур
Пахтакор – Навбаҳор 0:2
Голлар: Катулонди Кати, 47 (0:1), Русланбек Жиянов, 65 пен (0:2)
Пахтакор: Владимир Назаров, Заид Таҳсин (Шаҳзод Азмиддинов, 84), Ҳожиакбар Алижонов, Иброҳим Ибрагимов, Акмал Мозговой, Ҳожимат Эркинов, Пётр Пажишек, Сардор Собирхўжаев, Шерзод Насруллаев, Муҳаммадрасул Абдумажидов, Ойбек Бозоров.
Навбаҳор: Ўткир Юсупов, Саидазамат Мирсаидов, Русланбек Жиянов, Диёр Холматов, Бенжамин Тейди, Умар Адҳамзода, Катулонди Кати, Гиорги Жгереная, Анри Чичинадзе, Муҳаммадали Усмонов (Аббос Ғуломов, 87), Алекс Фернандес.