АҚШ қамоғидаги Мадуро халқига мурожаат йўллади
АҚШ қамоғида сақланаётган Венесуэла президенти Николас Мадуро 8 март – Халқаро хотин-қизлар куни муносабати билан ўз халқига ғайритабиий мактуб йўллади. Сиёсатчининг ўғли Николас Мадуро Герра отасининг ушбу мурожаатини ижтимоий тармоқлардаги саҳифаларида эълон қилди. Бу ҳақда tengrinews.kz хабар беради.
Мактубда Мадуро ватандошларини қийинчиликларни енгиб ўтишда имон ва эътиқодли бўлишга чақирган. У Исо пайғамбарнинг тоғларни жойидан қўзғатишга қодир бўлган имон ҳақидаги сўзларидан иқтибос келтириб, мамлакат бошига тушган синовлар тез орада барҳам топишига ишонч билдирган. Бу мурожаат президент АҚШда ҳибсга олинганидан кейин халққа йўллаган илк хабарларидан бири ҳисобланади.
Эслатиб ўтамиз, 2025 йил 3 январь куни АҚШ махсус хизматлари Венесуэла етакчиси Николас Мадуро ва унинг рафиқаси Силия Флоресни қўлга олган эди. 5 январь куни Нью-Йорк федерал судида уларга нисбатан гиёҳванд моддалар савдосига алоқадорлик айблови қўйилди. Мадуро ва унинг рафиқаси ўзларига қўйилган айбловларни тан олишмади. Айни дамда Венесуэла бошқарувини илгари вице-президент лавозимида ишлаган Делси Родригес вақтинча ўз зиммасига олган.