Ўзбекистон олтин-валюта захиралари тарихий рекордни янгилади
Ўзбекистоннинг олтин валюта захиралари ўз тарихидаги энг юқори кўрсаткичга етди. Марказий банк маълумотларига кўра, мамлакат захиралари 77 миллиард долларни ташкил этмоқда. Бу ўтган ойга нисбатан 2 миллиард долларга кўп дегани. Аввалроқ, февраль ойида бу кўрсаткич 75 миллиард доллар даражасида қайд этилган эди. Бу ҳақда podrobno.uz хабар беради.
Рекорд натижага эришилишида қимматбаҳо металл нархининг жаҳон бозорида ошиши асосий омил бўлди. Ҳозирги кунда мамлакатдаги олтиннинг физик ҳажми 13,1 миллион трой унциясини ташкил этиб, унинг қиймати 67,6 миллиард долларга баҳоланмоқда. Захираларнинг валюта қисми эса 8,8 миллиард долларга тенг.
Иқтисодчи Равшанбек Далимовнинг фикрича, олтин бугунги кунда геосиёсий жараёнларда муҳим қуролга айланиб бормоқда. Спекулятив капитал таъсирида олтин нархининг кескин ўсиши кузатилмоқда. Мутахассис Ўзбекистон ўзининг олтин бойликларини халқаро даражадаги заргарлик брендларига айлантириши учун тизимли ислоҳотлар зарурлигини таъкидлайди.