Каннаваро Шомуродов ва Файзуллаевларнинг ўйинини стадиондан кузатди...

Ўзбекистон миллий терма жамоаси бош мураббийи Фабио Каннаваро айни кунларда Туркияда бўлиб турибди. Италиялик мутахассис Туркия Суперлигасининг 25-тури доирасида ўтган “Истанбул Башакшехир” — “Гёзтепе” учрашувини стадиондан бевосита томоша қилди.

Бу баҳс ўзбек мухлислари учун ҳам алоҳида қизиқ бўлди: “Башакшехир” сафида Ўзбекистон терма жамоасининг икки футболчиси — Элдор Шомуродов ҳамда Аббос Файзуллаев асосий таркибда майдонга тушди. Каннаваро эса уларнинг ҳаракатларини жонли равишда кузатиб, форма, тайёргарлик ва майдондаги ролини қайта баҳолаш имкониятига эга бўлди.

Учрашувдан ташқари, Каннаваронинг Туркия сафари фақат футбол томоша қилиш билан чекланмади. Маълум қилинишича, у клуб президенти Гёксел Гюмюшдаг ва Мустафа Эрёғут, Туркия миллий терма жамоаси бош мураббийи Винченцо Монтелла ҳамда Селчук Шаҳин билан ҳам учрашган.

Истанбулликлар клуби тарқатган хабарда айтилишича, “Клуб президенти Гёксел Гюмүшдаг ва Мустафа Эрёғут Туркия миллий терма жамоаси бош мураббийи Винченцо Монтелла, Ўзбекистон миллий терма жамоаси бош мураббийи Фабио Каннаваро, шунингдек, Туркия терма жамоаси ва клубнинг собиқ мураббий ёрдамчиси Селчук Шаҳинни меҳмон қилди”. Учрашув “илиқ ва самимий муҳитда” ўтгани ҳам қайд этилган.

Қисқаси, Каннаваронинг Истанбулга ташрифи бир вақтнинг ўзида икки мақсадга хизмат қилди: биринчидан, терма жамоамиз легионерларини жойида кўриб баҳолаш; иккинчидан, турк футболи ва мураббийлар доираси билан алоқаларни мустаҳкамлаш. Бу эса келажакда ҳам терма, ҳам легионерларимиз учун фойда бериши мумкин бўлган “тўғри қадам” сифатида кўринади.