Кремл хатоси: Путиннинг таҳрирланмаган видеоси тарқалди (видео)
Владимир Путиннинг 8 март муносабати билан йўллаган табригининг таҳрирланмаган видеоси тасодифан интернетда эълон қилиниб кетди. Ушбу ҳолат Кремл матбуот хизмати томонидан техник хатолик сабаб юз бергани айтилмоқда.
Тарқалган видеода Путин табрик нутқини ёзиб олиш жараёни акс этган. Кадрларда у бир неча бор гапни тўхтатиб, нутқни қайта бошлашни сўрайди. Бир пайт у: “Бошқатдан гапира қолай, томоғим қирилди”, дея мурожаат қилади. Бу эса видеонинг монтаж қилинмаган, яъни хом ҳолдаги версияси эканини кўрсатади.
Одатда давлат раҳбарларининг байрам табриклари олдиндан тайёрланиб, бир неча марта ёзиб олинади ва кейин монтаж қилиниб эълон қилинади. Бироқ бу сафар техник ёки ташкилий хатолик туфайли таҳрирланмаган вариант оммага чиқиб кетгани айтилади.
Ижтимоий тармоқ фойдаланувчилари эса ушбу ҳолатни қизиқарли воқеа сифатида муҳокама қилмоқда. Айримлар буни оддий техник хато деб баҳоласа, бошқалар Кремл ахборот хизмати ишидаги эътиборсизлик сифатида кўрмоқда.