Китобсевар келин 800 та китобли сепи билан Қашқадарёда барчани ҳайратда қолдирди
Қашқадарё вилоятининг Кўкдала туманига Андижондан келин бўлиб тушган Насибахон Иброҳимова ноодатий келинлик сепи билан эътибор қозонди. У одатдагидек фақат рўзғор буюмлари эмас, балки 800 та илмий ва бадиий китобни ҳам ўзи билан олиб келди.
Бу ҳолат ёш келиннинг китобга, маънавиятга ва илмга бўлган алоҳида ҳурматини кўрсатди. Унинг бу қадами янги хонадонда мутолаа маданиятини янада кучайтиришга хизмат қилаётгани таъкидланмоқда.
Ҳозирда ёш оиланинг уйидаги китоблар сони 1500 тадан ошган. Бу эса ушбу хонадонда китобхонликка бўлган қизиқиш тобора ортиб бораётганини англатади.
Маҳаллий блогерлар фикрича, гаджетлар ва моддий эҳтиёжлар устувор бўлиб бораётган бугунги даврда бундай қарашдаги ёшларни учратиш осон эмас. Шу боис китобсевар келиннинг бу ташаббуси кўпчиликка ибрат бўладиган чиройли ҳолат сифатида баҳоланмоқда.