Серхи Роберто «Барселона»ни тарк этиш осон бўлмаганини айтди
«Барселона»нинг собиқ футболчиси Серхи Роберто клуб билан хайрлашиш жараёнини эслаб, бу қарор унга жуда оғир тушганини таъкидлади. 2024 йил ёзида 34 ёшли испаниялик ярим ҳимоячи Италияга йўл олиб, «Комо» сафига қўшилган ва ҳозир ҳам шу жамоа шарафини ҳимоя қилмоқда. Бу ҳақда euro-football.ru хабар беради.
Роберто «Барселона»ни бутун ҳаёти давомида ўз уйи деб билганини, клубга бўлган муҳаббати жуда кучли эканини айтди. Шунга қарамай, у янги тажриба орттириш, бошқа маданият ва бошқа мамлакат ҳаётини кўришни истагани учун кетишга қарор қилганини билдирди.
Универсаллиги билан танилган футболчи каталон клуби тизимида 18 йилдан ортиқ вақт фаолият юритган. Унинг ҳисобида «Барселона»нинг асосий жамоаси сафида жами 373 та учрашув бор.