«Ливерпуль» АПЛ тарихида буни қилган иккинчи клуб бўлди
Англия чемпионатининг 28-тур учрашувларида амалдаги чемпион «Ливерпуль» «Вест Ҳэм» устидан йирик ҳисобда ғалаба қозонди — 5:2. Мерсисайдликлар асосий устунликни илк бўлимдайоқ қўлга киритиб, танаффусга қадар жавобсиз учта гол урди. Бу ҳақда euro-football.ru хабар беради.
Эътиборлиси, биринчи таймдаги уч голнинг барчаси бурчак зарбаларидан кейин рақиб дарвозасига йўл топди. Учрашувдан сўнг статистика маълумотларига кўра, «Ливерпуль» АПЛ тарихида биринчи бўлимнинг ўзида бурчаклардан уч марта гол уришга муваффақ бўлган атиги иккинчи жамоага айланди.
Бундай натижа аввал фақат «Манчестер Юнайтед» томонидан қайд этилган — 2016 йилда «Лестер»га қарши ўйинда. Қизиғи шундаки, ўша пайтда «Лестер» ҳам айнан амалдаги чемпион сифатида майдонга тушган эди.