Гальярдо кўз ёш тўкди, «Ривер Плейт»ни ҳеч ким тарк этмайди
Марсело Гальярдо мураббий сифатидаги сўнгги учрашувини ўтказди: унинг жамоаси «Банфилд»га қарши баҳсда 3:1 ҳисобида ғалаба қозониб, кетма-кет учта мағлубиятдан иборат омадсиз серияга нуқта қўйди. Бу ҳақда euro-football.ru хабар беради.
Айнан шу муваффақиятсиз давр Гальярдонинг лавозими билан хайрлашишига сабаб бўлди. Шунга қарамай, клуб унга муносиб тарзда кетиш имконини берди ва мураббий бу лаҳзани жуда таъсирли тарзда якунлади.
Учрашувдан кейин кўз ёшларини тийолмаган Гальярдо мухлисларга миннатдорлик билдирди: «Шунчаки ҳаммага раҳмат. Сизнинг меҳрингизни сўз билан ифодалаш қийин. Мен бутунлай кетмаяпман. «Ривер»дан ҳеч ким абадий кетмайди. Бу сеҳрли жой: кетсангиз ҳам, барибир клуб билан қолаверасиз», — деди у.
Эслатиб ўтамиз, Гальярдо 1990-йилларда «Ривер Плейт» сафида ҳам, Аргентина терма жамоасида ҳам тўп сурган.