Эрон терма жамоаси мундиалдан воз кечиши мумкин
2026 йилги жаҳон чемпионатига муваффақиятли йўлланма олган Эрон терма жамоаси АҚШ ва Исроил иштирокидаги зиддият кескинлашгани фонида турнирда қатнашмаслик эҳтимолини кўриб чиқмоқда. Бу ҳақда мамлакат футбол федерацияси раҳбари Меҳди Тож маълум қилди. Бу ҳақда euro-football.ru хабар беради.
Телевиденийедаги чиқишида Тож бугунги воқеалар, хусусан АҚШ ҳужуми ортидан мундиалга катта умид билан қараш қийинлигини таъкидлади. Унинг айтишича, якуний қарорни спорт соҳасидаги масъуллар қабул қилиши керак.
Маълумот учун, Эрон гуруҳ босқичидаги учта учрашувини ҳам АҚШда ўтказиши лозим: Янги Зеландия, Белгия ва Мисрга қарши. Шунингдек, 1/16 финалда эронликларнинг АҚШ терма жамоасига рўпара келиб қолиш эҳтимоли ҳам бор, бу эса FIFA учун қўшимча ташкилий муаммолар келтириб чиқариши мумкин.
Шу билан бирга, Эрон чемпионати алоҳида буйруққача тўхтатилгани айтилди. Кўплаб легионерлар аллақачон мамлакатни тарк этган ёки чиқиб кетишга уринмоқда.