«Галатасарай» ва «Фенербахче» футболчиларини тиккашлар учун қамоқ кутмоқда
«Галатасарай» ва «Фенербахче» сафида тўп сураётган икки футболчи тиккашлар билан боғлиқ иш бўйича қамоқ жазосига тортилиши мумкин. Бу ҳақда euro-football.ru хабар беради.
Гап «Галатасарай» футболчиси Метехан Балтаджи ҳамда «Фенербахче» сардори Мерт Ҳакан Яндаш ҳақида кетмоқда. Балтаджи 13 йилгача, Яндаш эса 17 йилгача озодликдан маҳрум этилиши эҳтимоли бор.
Sabah нашри маълумотига кўра, Балтаджи камида икки марта «Галатасарай» ўйинларига пул тиккан. У учрашувларда асосий таркибда майдонга тушмаган бўлса-да, жамоа қайдномасидан жой олгани сабабли вазиятга таъсир ўтказиш имкониятига эга бўлган, деб баҳоланмоқда.
Амалдаги Туркия қонунчилигига кўра, футболчи букмейкерларга ўзининг профессионал спортчи эканини маълум қилиши шарт эди, бироқ у буни бажармаган.