Килиан Мбаппе жароҳатлар бўйича шахсий антирекорд ўрнатди
Мадриднинг «Реал» клуби ҳужумчиси Килиан Мбаппе жорий мавсумда одатдагидан кўра тез-тез жароҳат олиб, жамоасига бир неча бор ёрдам бера олмади. Бу ҳақда euro-football.ru хабар беради.
Француз футболчи Чемпионлар лигасида «Бенфика»га қарши яқинда ўтган учрашувни тиззасидаги шикаст сабаб ўтказиб юборди. Шифокорлар ҳужумчининг яна бир неча ҳафта майдонга туша олмаслигини тахмин қилмоқда. Marca хабарига кўра, Мбаппе бу мавсум жароҳатлар туфайли 53 кун сафдан чиққан — бу 27 ёшли форвард учун шахсий энг ёмон кўрсаткич. Унинг аввалги антирекорди 2019/20 мавсумида «ПСЖ» сафида қайд этилган (51 кун).
Шунга қарамай, соғлиқ билан боғлиқ муаммолар Мбаппенинг сермаҳсул ўйинига жиддий таъсир қилгани йўқ: у барча мусобақаларда 33 учрашувда 38 та гол урди.