Радимов Аршавин билан нега футболчиларни адаштирганини айтди
"Зенит"нинг собиқ футболчиси Владислав Радимов "Ливерпул" учрашувларидан бирида икки футболчини адаштириб юборгани ҳақида гапирди. Бу ҳақда euro-football.ru хабар беради.
Радимов аввалроқ Андрей Аршавин билан бирга "Ливерпул"нинг Англия Премьер-лигасидаги уй ўйинларидан бирини стадионда томоша қилган. Улар учрашувнинг қарийб 70 дақиқаси давомида Виртснинг ўйинидан норозилик билдирган, бироқ кейинроқ немис футболчиси умуман майдонда бўлмагани маълум бўлган.
Радимовнинг сўзларига кўра, бунинг сабаби оддий: Аршавиннинг кўриши анча олдин ёмонлашган, Радимовда эса 50 ёшга келиб кўз нури пасайган. Виртс ва Мак Аллистер гавдаси ҳамда бўйи жиҳатидан ўхшаш бўлгани, устига-устак улар таркибни текширмагани сабабли футболчилар адашиб кетган.
Радимов Россия Премьер-лигаси ўйинларида бундай ҳолат у билан ҳеч қачон юз бермаганини ҳам қўшимча қилди.