Дешам Аргентина мундиалда ёрдам олган деган фикрга қўшилмади
Франсия терма жамоаси бош мураббийи Дидье Дешам 2022 йилги жаҳон чемпионатида Аргентина чемпион бўлганига доир баҳсларга яна бир бор тўхталди. Бу ҳақда euro-football.ru хабар беради.
Ўша мундиал финалида аргентиналиклар франсузларни мағлуб этганди: 120 дақиқа якунида ҳисоб 3:3 бўлиб қолган, пеналтилар сериясида эса “альбиселесте” аниқроқ ижро этган.
Дешамнинг айтишича, Аргентина рақиблари дарвозасига белгиланган ягона жиддий баҳсли пеналти Польшага қарши ўйинда бўлган ва у ҳам голга айлантирилмаган. Унинг таъкидлашича, Аргентина турнирда урган 15 голининг атиги тўрттасини пеналтидан киритган. Шунингдек, илк учрашувда ҳакам аргентиналикларнинг учта голини бекор қилганини, Нидерландияга қарши баҳсда эса қўшимча вақт ҳаддан ташқари кўп қўшилгани ва бир эпизодда баҳсли фол қайд этилганини эслатди.
“Финалда аргентиналикларга ёрдам беришди” деган гапларни Дешам тушунмаслигини айтди. Мураббий Франсия томони пеналти бўйича эътироз билдирмаганини, чунки вазият адолатли кўринганини қўшимча қилди. У Аргентина ва Франсияни “мундиаллар тарихидаги энг буюк финаллардан бирини” яратгани учун табриклади.
Маълумот учун, Дидье Дешам 2026 йилги жаҳон чемпионати якунида Франсия терма жамоасидаги лавозимини тарк этади.