Мбаппенинг жароҳати кучайди: "Бенфика"га қарши ўйнай оладими?
Мадриднинг “Реал” клубида Чемпионлар лигаси жавоб баҳси олдидан хавотирли вазият юзага келди. Жамоа ҳужумчиси Килиан Мбаппе чап тиззасидаги безовталик сабаб машғулотни муддатидан олдин тўхтатишга мажбур бўлди. Франциялик юлдузнинг ҳолати “Бенфика”га қарши ҳал қилувчи ўйин олдидан мураббийлар штаби ва мухлисларни жиддий ўйга соляпти.
L’Equipe ва бошқа манбаларга кўра, Мбаппе сешанба кунги машғулотни охиригача етказа олмаган. Тиззасидаги оғриқ ҳали ҳам безовта қилаётгани учун, унинг 25 февраль куни “Бенфика”га қарши майдонга тушиши катта савол остида қолмоқда. Айрим хабарларда ҳатто клуб футболчига таваккал қилмасдан, дам бериш вариантини ҳам кўриб чиқаётгани айтилган.
Ҳозирча “қироллик клуби” расмий якуний қарорни эълон қилмаган. Шу боис, охирги сўз ўйин олдидан ёки айнан ўйин куни айтилиши мумкин. Айрим маълумотларга қараганда, бош мураббий Алваро Арбелоа ҳам қарорни шошилмай, бир кун кечиктириб қабул қилиш тарафдори. Бу эса Мбаппенинг ҳолати сўнгги соатларда яна бир бор баҳоланишини англатади.
Бир томондан, “Реал”да биринчи ўйинда қўлга киритилган 1:0лик устунлик бор. Иккинчи томондан эса, бундай кечаларда Мбаппе каби ўйинчининг йўқлиги ҳар қандай режага таъсир қилади. Чунки у фақат гол урадиган футболчи эмас — рақиб ҳимоясини ортга суриб, бутун ўйин ритмини ўзгартира оладиган фигура. Шунинг учун ҳам уни асраб қолиш ва майдонга тушириш ўртасидаги танлов клуб учун осон бўлмайди.
Қисқаси, Мадриддаги асосий интригалардан бири энди фақат ҳисобда эмас, таркибда ҳам. Мбаппе ўйнаса — “Реал” ҳужуми анча ўткир кўринади. Ўйнамаса — “Бернабеу”даги кеча бошқа қаҳрамонни талаб қилади.