Элдор Шомуродов Туркия чемпионатининг энг сермаҳсул футболчиси бўлди
Ўзбекистон терма жамоаси ҳужумчиси ва «Истанбул Башакшеҳир» клуби футболчиси Элдор Шомуродов Туркия чемпионатида энг кўп самарадорлик кўрсатаётган ўйинчи сифатида пешқадамлик қилмоқда. Бу ҳақда euro-football.ru хабар беради.
21-февраль ҳолатига кўра (Тошкент вақти билан) Шомуродов «гол+пас» тизимида 20 очко жамғарди: 16 та гол ва 4 та голли узатма. У турнир тўпурарлари рўйхатида ҳам биринчи ўринда бормоқда.
«Галатасарай» юлдузлари билан солиштирганда, Шомуродовнинг кўрсаткичлари анча юқори: Мауро Икардида барча ўйинларда 13 та гол бор, Виктор Осимҳен эса миллий чемпионат доирасида 9 та гол билан чекланмоқда.
Эслатиб ўтамиз, Шомуродов тўп тепаётган Ўзбекистон терма жамоаси Шимолий Америкада ўтадиган 2026 йилги Жаҳон чемпионатига йўлланмани қўлга киритган.