Дунёнинг энг бой одами умрининг охиригача қанча солиқ тўлайди?

Америкалик тадбиркор, SpaceX асосчиси ва Tesla раҳбари Илон Маск X ижтимоий тармоғида кутилмаган ҳисоб-китоби билан яна кун тартибига чиқди. Унинг ёзишича, умрининг охирига қадар тўлайдиган солиқ миқдори 500 миллиард доллардан ҳам ошиши мумкин.

Маскнинг фикрича, бу рақамга нафақат йиллик тўловлар, балки мерос/мулк билан боғлиқ солиқ мажбуриятлари ҳам “қўшилиб” кетади. Яъни гап бир йиллик тўлов эмас, бутун ҳаёт давомида йиғиладиган улкан сумма ҳақида кетяпти.

Маълумот учун, 2026 йил февраль бошларида Маск SpaceX ва сунъий интеллект йўналишидаги xAI’ни бир структурага бирлаштиргани ҳақида хабарлар тарқалди. Айрим нашрлар бу келишувдан кейин унинг бойлиги жуда кескин ошганини таъкидлаган.

Яна бир қизиқ эпизод: январ ойида Маск “бир йил шу қадар катта солиқ тўлаганманки, IRS компютери (ростдан ҳам) ишдан чиққан” деган мазмунда пост қолдирган, ҳатто “рақамлар жуда кўп бўлиб кетгани учун дастурни янгилашган” деб ҳазиломуз қўшимча қилган.

Қисқаси, Маск бу гаплари билан бир томондан “мен солиқ тўлаяпман” деган сигнал беряпти, иккинчи томондан эса улкан капитал билан давлат тизимлари “бир форматга сиғмай қолиши” мумкинлигини ҳам қоқиб ўтмоқда. Энди асосий қизиқ жойи — бу баёнотлар атрофидаги муҳокама яна қанча давом этиши.