«Вердер» Шимолий Америкадаги ёзги турнини бекор қилди
Германиянинг «Вердер» клуби кутилмаганда ёзги Шимолий Америка турнидан воз кечишга қарор қилди. Клуб бу қарорни нега айнан ҳозирдан эълон қилгани номаълум, бироқ молиявий томондан зарба аввало ўзига тегиши аниқ. Бу ҳақда euro-football.ru хабар беради.
Жамоа раҳбарияти бу қадамни принципиал позиция билан изоҳлади: уларнинг айтишича, «одамлар ўлдириладиган жойда» ўйнамасликни маъқул кўришмоқда. Бу изоҳ клуб атрофида баҳсларни ҳам кучайтирди.
«АҚШнинг Миннесота штатида АҚШ расмийлари томонидан икки киши ўлдирилгани ҳақида хабарлар бор. Бизда принцип бор: одамлар кўчада бўлгани учунгина хавф остида қолиши мумкин бўлган жойда майдонга тушмаймиз», — деди клуб бош директори Клаус Филбри. Унинг сўзларини DeichStube келтирди.
Аввалроқ Германияда АҚШда бўлиб ўтадиган жаҳон чемпионатини бойкот қилиш ғояси ҳам муҳокама қилинаётгани ҳақида хабарлар тарқалган эди.