Антонио Рюдигер ёзда «Ювентус» сафига ўтиши мумкин
Мадриднинг «Реал» клуби ҳимоячиси Антонио Рюдигер яна А Серияга қайтиши эҳтимоли бор. Бу ҳақда euro-football.ru хабар беради.
Calciomercato хабарига кўра, германиялик футболчига «Ювентус» қизиқиш билдирмоқда. Турин клуби уни шу ёзда, «Реал» билан шартномаси якунланиб эркин агентга айланганидан сўнг, таркибга қўшиб олишни режалаштирмоқда. Рюдигер аввалроқ Италияда «Рома» сафида ҳам тўп сурган.
Рюдигер 2022 йилда «Челси»дан «Реал»га эркин агент сифатида келиб қўшилганди. Жорий мавсумда у барча мусобақаларда 11 та учрашувда майдонга тушди ва самарали ҳаракатлар қайд этмади. Transfermarkt портали футболчининг бозор қийматини 12 миллион евроға баҳоламоқда.