Антонио Рюдигер ёзда «Ювентус» сафини кучайтириши мумкин
Мадриднинг «Реал» клуби ҳимоячиси Антонио Рюдигер фаолиятини яна А Серияда давом эттириши эҳтимоли бор. Бу ҳақда euro-football.ru хабар беради.
Calciomercato хабарига кўра, немис футболчисини «Ювентус» ўз сафига қўшиб олишга қизиқмоқда. Турин клуби Рюдигерни ёзда эркин агентга айлангач, яъни «Реал» билан шартномаси якунлангандан кейин трансфер қилишни режалаштирмоқда. Рюдигер аввалроқ Италияда «Рома» сафида ҳам ўйнаган.
Антонио Рюдигер 2022 йилда «Челси»дан «Реал»га эркин агент сифатида келиб қўшилганди. Жорий мавсумда у барча мусобақаларда 11 ўйинда майдонга тушди, бироқ ҳозирча гол ёки ассист билан ажралиб тургани йўқ. Transfermarkt портали ҳимоячининг қийматини 12 миллион еврога баҳоламоқда.