Елагин Роналду бойкотдан қайтиб яна гол урди
Саудия Арабистони чемпионатининг 22-турида «Ал-Наср» сафарда «Ал-Фатех»ни 2:0 ҳисобида мағлуб этди. Учрашувдаги голлардан бирига 41 ёшли марказий ҳужумчи Криштиану Роналду муаллифлик қилди — у бойкотдан кейин майдонга қайтиб, дарҳол ўз сўзини айта олди. Бу ҳақда euro-football.ru хабар беради.
Ўйинни шарҳлаган футбол комментатори Александр Елагин португалиялик юлдузнинг ҳаракатларидан ҳайратда қолганини айтди. Унинг таъкидлашича, Роналду нафақат гол урди, балки ҳимояда ҳам фаол ишлади: жарима майдони ичида бир неча бор тўпни узоқлаштириб, жамоасига ёрдам берди.
«Буюк футболчи бойкотдан кейин қайтди ва гол урди. Энг қизиғи, ҳимояда ҳам жонбозлик кўрсатди — дарвозабон майдонидан тўпни бир неча марта тепиб чиқарди. Йигитлардек югуради! Ҳам қойил қоламан, ҳам ҳавас қиламан», — деб ёзди Елагин ижтимоий тармоқларда.
Жорий мавсумда Саудия Арабистони чемпионатида Роналду 19 учрашувда 18 та гол урди.