Жезуш Роналдуга дам берди ва у навбатдаги ўйинни ўтказиб юборади
«Ал-Наср» бош мураббийи Жорже Жезуш Криштиану Роналдунинг яқинлашиб келаётган учрашувда майдонга тушмаслиги сабабини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши баҳс олиб боради. Португалиялик юлдуз ҳужумчи тез орада яна сафга қайтиши кутилаётган бўлса-да, бу ўйинда у яна қайдномадан жой олмайди.
Жезушнинг сўзларига кўра, жамоа тиғиз тақвим сабаб Роналдуни ҳамда асосий таркибдаги яна бир қатор футболчиларни асрашга қарор қилган. Мураббий олдинда «Ал-Фатеҳ»га қарши муҳим учрашув борлигини таъкидлади.
Al Nassr Zone келтирган иқтибосда Жезуш Роналдунинг дам олиши янгилик эмаслигини ҳам эслатиб ўтди: у Саудия Арабистонидан ташқарида ўтадиган ўйинларда аввал ҳам бир неча бор майдонга тушмаган.
Саудия чемпионатидаги «Ал-Фатеҳ» – «Ал-Наср» учрашуви шанба куни, 14 февраль куни бўлиб ўтади.