Майкл Олисе Бундеслигадаги илк ўйинини ўтказиб юборади
“Бавария”нинг қанот ҳужумчиси Майкл Олисе Германия чемпионатининг навбатдаги турида “Вердер”га қарши баҳсда майдонга туша олмайди. Бу ҳақда euro-football.ru хабар беради.
Ўтган турда франсуз футболчи мавсумдаги бешинчи сариқ карточкасини олиб, дисквалификацияга учради. Шу боис у яқинлашиб келаётган учрашувда жамоасига ёрдам бера олмайди. Бу Олисе учун 2024 йил ёзида “Кристал Пэлас”дан “Бавария”га ўтганидан бери Бундеслигада биринчи бор ўйинни ўтказиб юбориши бўлади.
24 ёшли футболчи бунгача Бундеслигада кетма-кет 55 та ўйинда қатнашиб, 22 та гол урди ва 36 та голли узатма берди. “Бавария”нинг ҳозирги таркибида бундай сермаҳсуллик кўрсаткичига эга футболчи йўқ.
Германия чемпионатининг 22-тури доирасидаги “Вердер” — “Бавария” учрашуви 14 февраль куни бўлиб ўтади. Старт ҳуштаги 19:30 да (Тошкент вақти билан) янграйди.