Джикия «Антальяспор»ни тарк этиши мумкин, агент сабабини айтди
Туркиянинг «Антальяспор» клубида тўп сураётган россиялик ҳимоячи Георгий Джикиянинг келажаги борасида унинг агенти Малик Арутюнов изоҳ берди. Бу ҳақда euro-football.ru хабар беради.
Агентнинг айтишича, футболчи маош кечиктирилаётганидан норози ва шу боис Россия Премьер-лигаси жамоаларидан тушаётган вариантларни кўриб чиқмоқда. Арутюновга кўра, тўловлар ноябр ойидан бери ушланиб қолган, бироқ Джикия Туркиядаги шароитларнинг қолган жиҳатларидан мамнун.
32 ёшли ҳимоячи «Антальяспор» сафига ўтган ёзда қўшилган ва турк клуби билан икки йиллик шартнома имзолаган.
Жорий мавсум Туркия Суперлигасида Джикия 12 та учрашувда майдонга тушди, 2 та гол урди ҳамда 3 та сариқ карточка олди.