Apple iPhone 18 Pro нархини оширишни ўйламаяпти: қанча бўлиши мумкин?
Смартфон бозорида нархлар тепага қимирлаб турган бир пайтда Apple янги авлод қурилмаларини «ҳозирги даража»да ушлаб қолишга ҳаракат қилаяпти. ОАВдаги таъминот занжири таҳлилларига кўра, гап iPhone 18 Pro ҳақида кетяпти: тезкор хотира (RAM) танқислиги ва эҳтиёт қисмлар қимматлашуви шароитида ҳам компания нархни «партлатмаслик» учун ички ҳисоб-китобларни қаттиқ ушлаяпти.
Шундай вазиятда энг катта «оғриқ нуқтаси» — хотира компонентлари. Таҳлилларда Samsung ва SK hynix каби етказиб берувчилар билан шартларни юмшатиш, нархни тушириш ёки камида ўсишни секинлатиш учун музокаралар кучайгани айтиляпти. Қисқаси: Apple «қиммат бўлса ҳам сизга уриб юбора қолай» демай, ўз зиммасига олиш вариантини ҳам ўйлаяпти — хизматлардан тушадиган даромад эвазига босимни енгиллатиш сценарийи тилга олинади.
Ҳозирги «Pro» сегментидаги нарх манзараси ҳам бу курашни тушунтиради. Масалан, iPhone 17 Pro АҚШда 1 099 доллардан бошлангани, шу билан бирга базавий хотира ҳажми ҳам оширилгани ҳақида ёзилди. Шу фондагина кейинги авлодда нархни ўша атрофда ушлаб қолиш — маркетинг эмас, реал стратегия: рақобат қаттиқ, харидор эса «янги модель — янги қарз» сценарийидан чарчаяпти.
Энг қизиғи, компания фақат RAM эмас, бошқа қиммат деталлар — айниқса дисплей ва камера атрофида ҳам харажатни қисқартириш йўлларини излаяпти деган қараш бор. Агар шу режа иш берса, iPhone 17 Pro Max каби юқори сегментда ҳам нарх босими сал юмшаши мумкин.
Якун: агар бозордаги танқислик ва қимматлашув давом этса ҳам, Apple’нинг мақсади битта — «Pro’ни Pro нархида қолдириш», уни люксга айлантириб қўймаслик. Энди бари таъминот занжири ва баҳор-ёздаги қарорларга боғлиқ: ким кимга нечоғлик «чегирма» беради — ўша ғолиб.