Луи Саа Карикни МЮда қолдиришга чақирди
«Манчестер Юнайтед»нинг собиқ ҳужумчиси Луи Саа клуб вақтинчалик бош мураббийи Майкл Карикка ишонч билдирди. Аввалроқ Майкл Оуэн ҳам Карикка имконият бериш кераклигини таъкидлаганди. Бу ҳақда euro-football.ru хабар беради.
Саа фикрича, Карик жамоа билан қисқа вақт ичида ўзини кўрсата олди: ўйин услубида ҳам, натижаларда ҳам ижобий ўзгаришлар сезилди. У Карикни меҳнаткаш ва камтар инсон сифатида таърифлаб, клуб ДНКсини чуқур билиши ҳамда футболчи сифатида «Олд Траффорд»даги босимни бошдан кечирганини алоҳида қайд этди.
Шу билан бирга, Саа Анчелотти ёки Зидан каби тажрибали мутахассислар номи муҳокамага чиқса, бу бошқа даража бўлишини ҳам эслатди.
Айни пайтда «Манчестер Юнайтед» Англия Премьер-лигаси турнир жадвалида тўртинчи ўринда бормоқда.