Роберто Карлос Роналдунинг 1000 голли пойгаси ҳақида гапирди
Бразилия терма жамоаси ва Мадриднинг «Реал» клуби собиқ футболчиси Роберто Карлос 41 ёшли португалиялик ҳужумчи Криштиану Роналду фаолияти давомида 1000 та гол уриш мақсади ҳақида фикр билдирди. Бу ҳақда euro-football.ru хабар беради.
«Роналду мухлислари учун Криштианунинг тарих ёзаётгани ва янги рекордлар ўрнатаётганини кўриш жуда ёқимли. 1000 та гол урган ягона футболчи — Пеле. Роналду ҳам бу рўйхатни кенгайтириши мумкин», — дея Карлоснинг сўзларини O Jogo келтирди.
Жорий мавсумда юлдуз тўпурар Саудия Арабистонининг «Ал-Наср» сафида 22 учрашув ўтказиб, 18 та гол урди ва 3 та голли узатма берди. Шунингдек, Роналду Саудия лигаси ичидаги трансфер қарорларидан норози бўлгани сабаб «Ал-Наср»нинг сўнгги ўйинларида майдонга тушмади.