Булыкин Россия бансиз қолиши бўйича умидини билдирди
Футбол эксперти Дмитрий Булыкин «Евро-Футбол.Ру»га берган интервьюсида ФИФА президенти Жанни Инфантино Россияга қўйилган тақиқни бекор қилиш тарафдори экани ҳақидаги фикрлари ҳамда ХОК яқин келажакда россиялик спортчиларга нисбатан санкцияларни юмшатиши мумкинлиги борасидаги хабарларга муносабат билдирди. Бу ҳақда euro-football.ru хабар беради.
Булыкниннг айтишича, айрим манбаларда 2028 йилга бориб барча россияликларни мусобақаларга қайтариш ғояси муҳокама қилинаётгани тилга олинмоқда. У бундай сценарий футболга ҳам тезроқ тааллуқли бўлишига умид қилди, бироқ Беларусь терма жамоаси билан ўйнашдан бош тортиш ҳолатлари ижобий сигнал эмаслигини ҳам эслатди.
Экспертнинг фикрича, масалани спорт тамойиллари асосида ҳал қилиш керак: куч кимда экани майдонда исботланиши лозим, турли бюрократик тўсиқлар ва ўзаро четлатишлар эса жараённи фақат чўзади.
УЕФА Эстония ва Литванинг ўсмирлар жамоаларига Беларусь билан ўйнашдан бош тортгани учун техник мағлубият бергани мисолига тўхталар экан, бундай қатъий қарорлар муаммони тартибга солишга ёрдам беришини таъкидлади. Булыкин ФИФА ва УЕФА принципиал позиция кўрсатса, учрашувлардан қочиш амалиёти ишламаслигини қўшимча қилди.
Булыкин ХОК санкцияларни юмшатган тақдирда ҳам футбол дарҳол шу йўлдан кетишига ишонмаслигини билдирди. Унинг таъкидлашича, Олимпиада тизими бир йўналиш бўлса, футболнинг ўз механизмлари ва қарор қабул қилиш тартиблари бор, аммо ҳар иккала йўналишда ҳам имкони қадар тезроқ мусобақаларга қайтиш муҳим.
Инфантинонинг Россияни четлатиш «мантиқсиз» экани ҳақидаги сўзларига баҳо берган Булыкин, баёнотлар кўп бўлаётганини, лекин амалий қарорлар ҳозирча кўринмаётганини айтди. Шунга қарамай, у яқин орада вазият «ўлик нуқтадан» силжиши ва россиялик спортчилар байроқ ҳамда мадҳиялари билан мусобақаларга қайтишига умид билдирди.
ФИФА раҳбари келажакда сиёсий сабабларга кўра жамоаларни мусобақалардан четлатишни қонуний жиҳатдан тақиқлаш кераклигини ҳам айтганди. Булыкин бу ташаббусни қўллаб-қувватлаб, футбол доимо сиёсатдан ташқарида бўлиши кераклиги таъкидланиб келганини, бироқ айни вазиятда сиёсат биринчи ўринга чиқиб қолганини қайд этди.
Россияга қўйилган бан қачон олиб ташланиши мумкинлиги ҳақида гапирар экан, Булыкин жараён узоққа чўзилмаслигига ишонишини айтди. У аввало ўсмирлар ва аёллар терма жамоаларини қайтариш катта қадам бўлишини, энг яхши вариант эса барча жамоаларнинг бир йўла мусобақаларга қўйилиши эканини таъкидлади.
2026 йилда бу реал бўладими, деган саволга Булыкин буни амалга ошириш жуда қийин бўлишини тан олди, бироқ доимгидек ижобий ечимдан умид узмаслигини қўшиб қўйди.