Беҳаёлик билан қилинган ички кийим рекламаси учун “Lady Eva” дўкони суд жавобгарлигига тортилади
Ижтимоий тармоқларда тарқалган “Lady Eva” кийим-кечак дўконига тегишли ахлоқий меъёрларга зид реклама ролиги жамоатчилик орасида кенг муҳокамага сабаб бўлди. Видеода ички кийимлар “беҳаё” иборалар билан тақдим этилган бўлиб, бу кўпчилик томонидан миллий ва оилавий қадриятларга зид, одобсизлик деб баҳоланди.
Мазкур ҳолат юзасидан Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан дастлабки ўрганиш ишлари олиб борилди. Ўзбекистон Республикаси Маънавият ва маърифат маркази ушбу рекламанинг жамият ахлоқи ва одоб-ахлоқ меъёрларига мутлақо мос эмаслигини билдирган.
Тегишли хулосаларга таяниб, Рақобат қўмитаси “Lady Eva” савдо дўкони расмий юритувчиси бўлган ЯТТ Шаназаров Шавкат Шаусмановичга нисбатан маъмурий баённома расмийлаштирди ва ишни суд органларига юборди.
Эндиликда, ушбу ҳолат бўйича якуний қарорни суд кўриб чиқади. Тадбиркорнинг ҳаракати қонун доирасида баҳоланади.