"Сити" ғалабани бой берди: экспертлар Ҳусанов ўйинини қандай баҳолади?
Англия премьер-лигасининг 24-туридаги энг қаттиқ ва муросасиз беллашувлардан бири айнан Лондонда бўлиб ўтди. Чемпионлик пойгасида ҳар бир очко зарба қийматида турган паллада “Тоттенхэм” ўз майдонида “Манчестер Сити”ни қабул қилди ва икки тўп фарқида ортда қолганига қарамай, мағлубиятдан қутулиб қолди.
Учрашувнинг биринчи қисмида Гвардиола шогирдлари вазиятни тўлиқ назоратга олди. Райан Шерки ва Антуан Семеньо кетма-кет гол уриб, меҳмонларни 2:0 ҳисобида олдинга олиб чиқди. Айниқса, “Сити”нинг тезкор ўтишлари ва ҳужумни бир пасда очиб кетиш услуби биринчи бўлимда “Тоттенхэм” ҳимоясини анча қийнаб қўйди.
Бироқ иккинчи бўлим бутунлай бошқа саҳнага айланди. Мезбонлар босимни кескин оширди, ҳужумлар серияси бошланди ва Доминик Соланке дубль қайд этиб, ҳисобни 2:2 қилиб тенглаштирди. Қолган дақиқаларда ҳам ўйин юқори темпда давом этди, аммо таблода рақамлар ўзгармади — томонлар биттадан очкони бўлишиб олди.
“Сити” футболчиларига берилган баҳолар
Ушбу ўйиндан сўнг нуфузли манба — esteemedkompany.com портали “Манчестер Сити” ўйинчиларининг ҳаракатларини баҳолаб чиқди. Қуйида энг асосий эпизодлар билан бирга берилган рейтинглар:
Жанлуижи Доннарумма — 8/10
Италиялик посбон иккинчи бўлимдаги тўхтовсиз босим пайтида жамоани бир неча бор қутқариб қолди. Кетма-кет сейвлар — “Сити”нинг дурангга ҳам бўлса “тешик қайиқ” эмас, бутун қайиқ бўлиб етиб келишида ҳал қилувчи омил бўлди.
Матеуш Нуньеш — 6/10
Ҳимояда ҳам, тўп билан ишлашда ҳам у кутилган даражада барқарор кўрина олмади. Айрим эпизодларда қарор қабул қилишда кечикишлар сезилди.
Абдуқодир Ҳусанов — 6/10
Ҳамюртимиз учрашув бошида муҳим тўсиқлар қўйди, бир неча вазиятда рақиб ҳужумчиларини “ўчириб” қўйди. Бироқ ўйланмасдан қилинган қўпол ҳаракат сариқ карточкага сабаб бўлди ва шундан кейин Ҳусановнинг ўйинидаги ишонч бир оз пасайгани кўзга ташланди.
Марк Гехи — 6,5/10
Тўп билан ишлашда маданиятли ҳаракат қилди, бироқ Соланкенинг хавфли чиқишларини тўлиқ нейтраллаштира олмади.
Райан Айт-Нури — 6/10
Жон-жаҳди билан ҳаракат қилди, аммо баъзи вазиятларда ўйин марказидан четда қолиб кетди — таъсири камроқ бўлди.
Нико О’Райли — 6,5/10
Биринчи бўлимда ярим ҳимояда яхши ишлади. Кейин позиция ўзгариши туфайли чап ҳимояга ўтгач, ҳужумга таъсири аввалгидек бўлмади.
Родри — 6,5/10
Биринчи бўлимдаги назорат ва тақсимот — юқори даража. Иккинчи бўлимда чарчоқ таъсир қилди, ўйин кескинлашган пайтда эҳтиёткорлик учун алмаштирилди.
Бернарду Силва — 7/10
Жамоа сардори яна одатдагидек ишчи мотор бўлди. Бироқ ўйин охирига бориб куч анча сарфлангани сезилди ва у ҳам алмаштирилди.
Райан Шерки — 7,5/10
Гол урди, ҳаракатланиши ва позиция танлаши билан ҳам жамоага фойдали иш қилди. Унинг фаоллиги “Сити”га биринчи бўлимда катта устунлик берган омиллардан бири бўлди.
Антуан Семеньо — 7,5/10
Гол билан бирга ўйинда энг ёрқин кўринган футболчилардан бўлди. Қанотдаги тезлиги ва кескин ҳаракатлари хавф яратди.
Эрлинг Холанд — 6,5/10
Шеркига голли узатма берди, лекин ҳисобни 2:0 дан ҳам қулайроқ қилиш имкониятини ишончи кам зарба билан бой берди. Иккинчи бўлимда эса ўйинга таъсири пасайди.
Захирадан тушганлар:
Нико — 6/10 — ярим ҳимояда меҳнат қилди, аммо кўпчилик фикрича, босим кучайган пайтда у эртароқ қўшилганида фойдаси каттароқ бўларди.
Тижжани Рейндерс — 6/10 — ҳаракатчанлик бор, икки марта бош билан гол уриш имконияти ҳам пайдо бўлди, лекин аниқлик етишмади.
Жадвал, фарқ ва олдиндаги катта ўйин
Бу дурангдан кейин “Манчестер Сити” очколарини 47 тага етказиб, мусобақа жадвалида иккинчи ўринда қолмоқда. “Арсенал” бу турда ғалаба қозонгани сабаб, пешқадам билан орадагги фарқ 6 очкога чиқди.
Энди “шаҳарликлар”ни яна бир жуда оғир синов кутяпти: 8 февраль куни сафарда амалдаги чемпион — “Ливерпуль”га қарши баҳс. Агар “Сити” чемпионлик орзусини ҳақиқатга айлантирмоқчи бўлса, ана шу учрашувда “ҳисоб-китоб” аниқ, хатолар эса минимум бўлиши шарт.