Шереметево Домодедово аэропортини 66 млрд рублга сотиб олди
"Домодедово" аэропортининг янги эгаси Шереметево шўба корхонаси - "Перспектива" МЧЖ бўлди. Бу ҳақда РБК хабар бермоқда.
Савдолар давомида нарх дастлаб эълон қилинган 132,2 млрд рублдан минимал таклиф нархигача икки баравар пасайди. Кимошди савдосида Внуково аэропортига эгалик қилувчи компания ҳам иштирок этди.
РБК маълумотларига кўра, Домодедовонинг янги эгалари аэропортнинг 75 млрд рублдан ортиқ кредитлар бўйича қарзини тўлашга мажбур бўлади.
Домодедовани сотиш бўйича биринчи кимошди савдоси харидорлар йўқлиги сабабли ўтказилмади. Иштирок этиш учун ягона ариза якка тартибдаги тадбиркор Евгений Богатий томонидан юборилган. Комиссия эркакни савдога қўймади, чунки у барча ҳужжатларни тақдим этмаган.
2025 йил июнь ойида Домодедово аэропорти Москва вилояти Арбитраж суди қарори билан давлат мулкига ўтказилди. Суд аэропорт бенефициарлари бошқа давлатлар (Туркия, БАА ва Исроил) резидентлари бўла туриб, мамлакат учун стратегик активларга эгалик қилганликларини ва фойдани чет элга олиб чиқиб кетганликларини тан олди, бу эса Россия Федерацияси қонунчилигини бузади.
Ўтган йил охирида Россия молия вазири Антон Силуанов Домодедовани хусусийлаштириш бўйича аукцион 2026 йил бошида бўлиб ўтишини, потенциал инвесторлар топилганини айтганди. Январь ойи ўрталарида Домодедово "Авито"да сотувга қўйилди.