Мбаппе Чемпионлар лигасида Роналдунинг рекордини янгилади
Мадриднинг “Реал” клуби ҳужумчиси Килиан Мбаппе “Бенфика”га қарши учрашувда гол уриб, Чемпионлар лигасида янги рекорд ўрнатди. Бу ҳақда euro-football.ru хабар беради.
Француз футболчи баҳснинг 30-дақиқасида рақиб дарвозасини ишғол қилди. Шу тариқа Мбаппенинг жорий Чемпионлар лигаси мавсумидаги голлари сони 12 тага етди ва бу турнирнинг гуруҳ/умумий босқичи учун янги рекорд бўлди. 27 ёшли форвард бу кўрсаткич билан “Реал”нинг собиқ юлдузи Криштиану Роналдуни ортда қолдирди: португалиялик 2015/16 йилги мавсум гуруҳ босқичида 11 марта гол урган эди. Ўша кампанияда Роналду жами 16 та гол билан “қироллик клуби”га совринни қўлга киритишда катта ҳисса қўшган.
Қайд этиш жоиз, Мбаппе 12 та голга етиш учун атиги етти ўйин ўтказди. Роналду эса 11 та голни олти учрашувда урган — ўша пайтда гуруҳ босқичи атиги олти турдан иборат эди.