Давид Трезеге Буэнос-Айресда «Ривер Плейт» раҳбариятига қайтди
Туриннинг «Ювентус» клуби ва Франция терма жамоасининг собиқ ҳужумчиси Давид Трезеге Аргентинага яна бир бор қайтди. У аввалроқ «Ривер Плейт» сафида тўп суриб, жамоа билан Аргентина футболининг иккинчи дивизионида чемпионликни ҳам қўлга киритганди. Бу ҳақда euro-football.ru хабар беради.
Эндиликда Трезеге клубга футболчи сифатида эмас, балки раҳбарият таркибида иш бошлаш учун қайтмоқда. «Ривер Плейт» уни бутун бошқарув жамоаси иштирокидаги тақдимот маросимида таништирди.
Трезегенинг «Ривер Плейт»даги аниқ лавозими расман очиқланмаган, бироқ у стратегик масалалар билан шуғулланиши ва клубни институционал даражада вакиллаши маълум қилинди.
Эслатиб ўтамиз, француз футболчи фаолиятини 2015 йилда якунлаган.