Президент Мирзиёев ИИВда кадрлар ўзгаришини амалга оширди
Президент Шавкат Мирзиёев Ички ишлар вазирлигида бир қатор кадрлар тайинлов ва озод этишлар бўйича қарорлар қабул қилди. Бу ҳақда uzdaily.uz хабар беради.
Аюбхон Раҳматуллаев ИИВ биринчи ўринбосари — Оператив-қидирув департаменти бошлиғи лавозимидан бошқа ишга ўтгани муносабати билан озод этилди. Шунингдек, Даврон Назармухамедов ИИВ вазир ўринбосари — Маънавий-маърифий ишлар ва кадрлар таъминоти департаменти бошлиғи лавозимини тарк этди.
Бўшаган лавозимларга янги раҳбарлар тайинланди. Ботир Қудратходжаев ИИВ биринчи ўринбосари — Оператив-қидирув департаменти бошлиғи этиб тайинланди. У бунга қадар Фавқулодда вазиятлар вазири лавозимида ишлаган.
Рустам Жураев ИИВ биринчи ўринбосари — Жамоат хавфсизлиги департаменти бошлиғи лавозимига тайинланиб, шу муносабат билан Ўзбекистон Миллий гвардияси қўмондони лавозимидан озод этилди.
Рустам Мирзаев коррупцияга қарши курашиш бўйича комплаенс ва ички назорат масалалари юзасидан ИИВ вазир ўринбосари этиб тайинланди. У аввал Президент Администрацияси Коммуникациялар департаменти бошлиғи ўринбосари лавозимида фаолият юритган.
Диёрбек Сатторов эса ИИВ вазир ўринбосари — Маънавий-маърифий ишлар ва кадрлар таъминоти департаменти бошлиғи этиб тайинланди. Тайинловга қадар у Президент Администрациясининг Жамоат хавфсизлиги ва қонун устуворлиги масалалари департаментида сектор мудири бўлиб ишлаган.