Николай Валуев тарқалган видеони сунъий интеллект маҳсули деб атади

Аввалроқ интернетда россиялик депутат, оғир вазн тоифасидаги собиқ жаҳон чемпиони Николай Валуев гўёки “Россия 30 йилдан бери собиқ совет республикаларига нисбатан юмшоқ сиёсат юритди, энди эса уларга қаттиқ чоралар кўриш керак” деган мазмунда фикр билдиргани акс этган видеолар тарқалган эди.

Валуев эса ушбу лавҳалар ҳақиқатга мос эмаслигини билдириб, видео тўлиқ қайта ишлангани ва атайлаб тарқатилганини айтди. Унинг сўзларига кўра, ролик сунъий интеллектдан фойдаланилган ҳолда тайёрланган бўлиб, ундаги гаплар бузиб кўрсатилган ёки умуман бошидан охиригача “хоҳлагандай қилиб” яратилган бўлиши мумкин.

Депутатнинг таъкидлашича, бундай контентнинг мақсади оддий — интернетда нафрат уйғотиш. Валуев видеоролик форматидаги ахборот кўпинча томошабинни ишонтиришга қаратилишини, шу сабаб сунъий интеллект каби воситалар манипуляция учун “қулай” бўлиб қолаётганини қайд этди. У, шунингдек, ҳозир технологиялар ёрдамида инсон иштирокисиз ҳам видео ва фильм маҳсулотларини яратиш мумкинлигини, фарқи шундаки, бундай имкониятлар энди кенг омма учун ҳам очиқ эканини урғулади.