Собиқ «Фенербахче» футболчиси Моуриньёни қаттиқ танқид қилди
«Фенербахче»нинг собиқ футболчиси Линкольн клубнинг 2024–2025 йиллардаги бош мураббийи бўлган Жозе Моуриньодан норози эканини очиқ айтди. Бу ҳақда euro-football.ru хабар беради.
Линкольннинг сўзларига кўра, португалиялик мутахассис унга берган ваъдасида турмаган. «У кўп соврин ютган, буни ҳеч ким инкор этмайди. Лекин менга нисбатан ҳурматсизлик қилди. Ҳаётда характер унвонлардан муҳимроқ», — дея футболчи «Fanatik» нашрига берган интервьюсида фикр билдирди.
Унинг таъкидлашича, «Халл Сити»га ижара асосида кетишидан олдин Моуринью билан гаплашган ва мураббий уни ёзги йиғинга Португалияга кутишини айтган. Бироқ Линкольн ижара муддати тугагач, йиғинга чақирув бўлишини кутган, аммо алоқа ўрнатишга уринганда Моуринью мулоқотдан бош тортган ва уни спорт директори билан гаплашишга йўналтирган.
Линкольн вазият янада кескинлашганини ҳам айтди: жамоа Португалияда йиғинда бўлган пайтда у ҳам Португалияда бўлишига қарамай, Моуринью уни Истанбулга юбориб, алоҳида машғулот қилишни буюрган. Футболчи буни адолатсиз ва ҳурматсиз муносабат сифатида баҳолади.
«Кўп ўйинларда клубга ёрдам бериш учун қўлимдан келганини қилдим, ҳатто ўзимга хос бўлмаган позицияда ҳам ўйнадим. Оғир жароҳат олдим, қўллаб-қувватлаш кутгандим, лекин олмадим. Мен бошқалар каби машҳур эмасман, аммо майдонда доим боримни бердим», — деди у.
Ҳозирда Жозе Моуринью «Бенфика»ни бошқариб келмоқда.