Браим Диас учун Англиядан 60 миллионлик таклифлар бор

“Реал”нинг ҳужумкор футболчиси Браим Диас фаолиятини Англия Премьер-лигасида давом эттириши мумкин. Fichajes нашри тарқатган хабарга кўра, “қироллик клуби” ўз ўйинчиси бўйича Англиядан икки хил таклиф қабул қилиб олган ва уларнинг умумий қиймати 60 миллион еврогача етади.

Манба қайд этишича, таклифлар тузилмаси бир-бирига жуда яқин: инглиз клублари Диас учун 45 миллион евро кафолатланган тўлов ажратишга тайёр. Бундан ташқари, белгиланган шартлар бажарилса, яна 15 миллион еврогача бонуслар ҳам қўшилиши мумкин.

Жорий мавсумда Браимнинг ўйин амалиёти сезиларли даражада камайиб кетди. Бу ҳам табиий равишда унинг келажаги ҳақидаги гап-сўзларни кучайтиряпти. Футболчининг “Реал” билан шартномаси 2027 йил ёзигача амал қилади, аммо клуб уни қўлдан чиқариш вариантини ҳам кўриб чиқишга тайёр, деган маълумотлар бор.

Эътиборли жиҳати шундаки, Диасга қизиқиш билдираётган жамоалар сифатида “Астон Вилла” ва “Сандерленд” тилга олинмоқда. Премьер-лигада юқори ўринлар учун курашаётган бу клублар Браимни таркибни кучайтириш учун муҳим вариант деб билмоқда. Энг муҳими — улар футболчига барқарор тарзда майдонга тушиш, мунтазам ўйин вақти олиш имкониятини таклиф қилишга ҳам тайёр экани айтилаяпти.

Қисқаси, Браим учун Англия эшиклари анча кенг очиляпти: пул ҳам бор, рол ҳам бор, фақат қарор қолган — Мадридда навбат кутишми ёки Англияда “старт”ни олиб кетишми.