Инсинье клуб топа олмаса ҳам, умидини узмаяпти
«Наполи»нинг собиқ сардори Лоренсо Инсинье Шимолий Америкадаги фаолиятидан сўнг Италияга қайтди: у Канаданинг «Торонто» клубида тўп сурган эди. Бироқ ватанга келиши билан дарҳол янги жамоа топишнинг иложи бўлмади ва ҳозирча Инсинье эркин агент сифатида қолмоқда. Бу ҳақда euro-football.ru хабар беради.
Шунга қарамай, 34 ёшли футболчи спорт формасини ушлаб туриш учун тинимсиз ишлаяпти. Ижтимоий тармоқлардаги постларидан кўринишича, у спорт залида жиддий машғулотлар ўтказмоқда ва навбатдаги суратига «ҳеч қачон таслим бўлмайман» ҳамда «ҳар доим ишонаман» мазмунидаги сўзларни қўшиб ёзди.
Эслатиб ўтамиз, Инсинье «Наполи» сафида 2009 йилдан 2022 йилгача ўйнаган. У Италия терма жамоасида 54 учрашувда майдонга тушган ва 2021 йилда терма билан бирга Европа чемпионига айланган.