50 йиллик машиналарга чеклов Ўзбекистонда янги тартиб
Ҳукумат йўл ҳаракати хавфсизлигини кучайтириш ва соҳани рақамлаштиришга қаратилган янги қарорни қабул қилди. Адлия вазирлиги маълум қилишича, Жамоат хавфсизлиги департаменти Йўл ҳаракати хавфсизлиги хизмати ахборот тизимидаги “Маъмурий амалиёт” модули тегишли вазирлик ва идораларнинг ахборот тизимлари билан ўзаро боғланади.
Қарорга кўра, 2026 йил 1 февралдан бошлаб айрим тоифадаги транспорт воситалари учун алоҳида серияли давлат рақам белгиларини жорий этиш кўзда тутилган. Хусусан, умумий оғирлиги юки билан бирга 44 тоннадан ортиқ бўлган юк автомобиллари, кон, шахта ва карерларда ишлатиладиган махсус техникалар, юридик шахсларга тегишли йўналишсиз таксилар, шунингдек, антиквар автомототранспортлар алоҳида серияда рўйхатдан ўтказилади.
Энг катта янгиликлардан бири эса 50 йилдан ортиқ аввал ишлаб чиқарилган транспорт воситаларига тааллуқли. Энди бундай транспортлардан фойдаланиш ҳам, уларни қайта рўйхатдан ўтказиш ҳам тақиқланади. Мазкур тоифадаги автомототранспортлар давлат рўйхатидан чиқарилиши белгиланган.
Шу билан бирга, автомототранспорт рўйхатдан ўтказилганлиги ҳақидаги гувоҳномада мулкдор манзилини кўрсатиш талаби бекор қилинади. Бу амалиёт ҳужжатбозликни камайтириши ва маълумотлар алмашинувини соддалаштириши кутилмоқда.
Яна бир муҳим жиҳат — транспортни давлат рўйхатидан ўтказишда керак бўладиган айрим ҳужжатларни ваколатли органлардан идоралараро электрон ҳамкорлик орқали олиш тизими йўлга қўйилади. Жумладан:
автомототранспорт олди-сотди шартномаси
“Электрон онлайн аукционларни ташкил этиш” АЖ тақдим этадиган аукцион баённомалари
давлат улуши мавжуд корхоналар ишлаб чиқарган транспортлар бўйича электрон ҳисоб маълумотлар
транспорт мулкдори ҳақидаги маълумотлар
Аввалроқ Ўзбекистонда шаҳар транспорти ногиронлиги бўлган шахслар ва болали йўловчилар учун мослаштирилиши ҳақида ҳам хабар қилинган эди. Ташувчилар салонларни хавфсиз чиқиб-тушиш имконини берадиган тарзда жиҳозлаши шарт бўлиши қайд этилган.
Шунингдек, республика шаҳарларида 15 йилдан ортиқ ишлатилган автомобилларда таксичилик қилишни чеклаш масаласи ҳам кун тартибида. Йўналишсиз таксилар техник ҳолати ва жиҳозлари йўл ҳаракати хавфсизлиги талабларига тўлиқ жавоб бериши шартлиги яна бир бор эслатилмоқда.