Испанияда поездлар тўқнашуви тафсилотлари: қурбонлар сони ортмоқда
18 январь куни кечқурун Испания жанубидаги Кордова провинциясида икки тезюрар поезд иштирокида оғир фожиа рўй берди. Адамус шаҳарчаси яқинида Iryo компаниясининг Малагадан Мадридга йўл олган йўловчи поезди ҳамда Renfe’нинг Мадриддан Уэлва томон ҳаракатланган Alvia русумли поезди тўқнашиб кетди. Бир қарашда оддий рейс бўлиб кўринган сафар бир лаҳзада мамлакатни титратган ҳалокатга айланди.
Қандай қилиб тўқнашув содир бўлди?
El Pais маълумотларига кўра, маҳаллий вақт билан тахминан 19:45 да Iryo поездининг составидаги охирги учта вагон релсдан чиқиб кетган ва параллел ўтган йўлни тўсиб қўйган. Худди шу пайтда қарама-қарши йўналишдан Alvia поезди келаётган бўлган.
Афсуски, Alvia машинистида фавқулодда тормоз беришга вақт етарли бўлмаган. Оқибатда, поезднинг дастлабки икки вагони баландлиги тахминан тўрт метр бўлган темирйўл кўтармасидан пастга қулаб тушган. Фожианинг энг оғир зарбаси ҳам айнан шу ерда юзага келгани айтилмоқда.
Қурбонлар ва жабрланувчилар ҳақида охирги маълумот
Сўнгги расмий маълумотларга кўра, ҳалокат оқибатида 39 киши ҳаётдан кўз юмган. Яна 152 киши турли даражада тан жароҳати олган, шундан беш нафари ўта оғир аҳволда қолмоқда. Испания транспорт вазири Оскар Пуэнте қурбонлар сони ортиши мумкинлигидан ҳам огоҳлантирган.
Маълум қилинишича, поездларда жами 480 га яқин йўловчи бўлган. Вазирнинг сўзларига кўра, кўтармадан пастга қулаган вагонларда 53 киши жойлашган.
“Одамлар ёрдам сўрашарди…” — йўловчилар айтиб берган даҳшатли лаҳзалар
Фожиа гувоҳлари ҳодиса пайтида кучли силкиниш бўлганини, сўнг поезд тўхтагунича вагон ичида одамлар у ёқдан-бу ёққа уриб кетганини айтишмоқда. Йўловчилардан бири поезддан тушгач, биринчи вагон деярли бутунлай вайрон бўлганини кўрганини таъкидлаган.
Alvia поездида бўлган яна бир йўловчи эса шундай дейди: учинчи вагондан чиқиб олгач, биринчи ва иккинчи вагонлар жарликка тушиб кетганини кўришган. Қутқарув хизматлари келгунча йўловчилар ўзлари имкон қадар кўпроқ одамни чиқаришга уринган.
Iryo поезди йўловчиларидан бири эса ҳалокатнинг энг оғир томонини яширмайди: жароҳатлар жуда оғир бўлган, баъзилар эса кўз ўнгида жон берган — ва ўша лаҳзада инсоннинг қўли қисқа эканини ҳис қилишган.
Нима учун бу “жуда ғалати” ҳолат? Текширув бошланди
Авария сабаблари ҳозирча аниқ эмас. Текширув ўтказиш учун мустақил комиссия тузилган. Вазир Пуэнте фожиани “жуда ғалати” деб атаган, чунки тўқнашув 2025 йил майида янгиланган темирйўл участкасида содир бўлган.
Шунингдек, издан чиққан Iryo поезди 2022 йилда фойдаланишга топширилган ва ҳодисадан тўрт кун олдин текширувдан ўтказилгани қайд этилмоқда. Қолаверса, мазкур қисм инсон хатоси оқибатини минималлаштиришга мўлжалланган хавфсизлик тизими билан жиҳозлангани айтилган.
Renfe раҳбарияти маълум қилишича, ҳар икки поезд соатига 200 км тезликда ҳаракатланган бўлса-да, белгиланган тезлик меъёридан ошмаган.
Ҳаракат тўхтатилди, Адамусда дала шифохонаси очилди
Мадрид ва Андалусия ўртасида тезюрар поездлар қатнови камида тўрт кунга тўхтатилди. Йўловчилар автобусларга йўналтирилмоқда. Адамусдаги спорт зали вақтинчалик дала шифохонасига айлантирилган, воқеа жойида фавқулодда хизматлар, шифокорлар ва кўнгиллилар тинимсиз ишлаяпти.
Испания бош вазири Педро Санчес Давос иқтисодий форумидаги иштирокини бекор қилган. У Испания қироли ва қироличаси билан бирга Адамусга бориши кутилмоқда. Парламентда эса ҳалокат қурбонлари хотирасига бир дақиқалик сукут сақланди.
2013 йилдан бери энг оғир темирйўл фожиаси
Андалусиядаги мазкур ҳалокат Испания учун 2013 йилдан буён энг жиддий темирйўл аварияси сифатида қайд этилмоқда. Ўшанда Галисиядаги Сантяго-де-Компостела бекати яқинида Alvia поезди издан чиқиб кетиб, 70 дан ортиқ киши ҳалок бўлган, 100 дан ортиқ киши жароҳатланган эди.
Бу галги фожиа ҳам нафақат Испания, балки бутун Европада темирйўл хавфсизлиги, назорат тизимлари ва фавқулодда вазиятлардаги тайёргарлик ҳақидаги саволларни яна бир бор ўртага чиқарди. Энди энг асосийси — сабабларни очиқ ва холис аниқлаш, айбдорлар бўлса жавобгарликни таъминлаш ва бундай кун қайта такрорланмаслиги учун тизимли хулоса чиқариш.