Бензема фаолиятидан кейин “Реал” элчиси бўлиши кутилмоқда
“Реал” тарихидаги энг таъсирчан ва самарали ҳужумчилардан бири саналган Карим Бензема Мадриддан кетганидан кейин карьерасини Саудия Арабистонида — “Ал-Иттиҳод” сафида давом эттирмоқда. Аммо кўринишидан, франциялик тўпурарнинг “қироллик клуби” билан алоқаси барибир узилмайди.
Журналист Хорхе Пиконнинг маълум қилишича, 38 ёшли Бензема профессионал фаолиятини якунлаганидан сўнг “Реал” тизимида янги ролда пайдо бўлади. Манбага кўра, у “Реал”нинг расмий элчиси мақомида иш бошлаши кутилмоқда. Бу вазифа — клуб юзи бўлиш, расмий тадбирларда иштирок этиш, бренд ва тарихни халқаро майдонда тарғиб қилиш каби йўналишларни ўз ичига олади.
Айтилишича, Карим клуб вакиллари билан бўлиб ўтган музокараларда мазкур таклифга ижобий муносабат билдирган ва бу миссияни қабул қилишга тайёр эканини айтган.
Эслатиб ўтамиз, Бензема 2009–2023 йиллар оралиғида “Реал” шарафини ҳимоя қилди ва Мадриддаги ўн тўрт йиллик даврда 25 та совринни қўлга киритди. Улар орасида 5 марта Европа Чемпионлар лигаси ва 4 марта Испания чемпионлиги ҳам бор. У клуб тарихида нафақат голлари, балки ҳал қилувчи паллалардаги совуққонлиги, шерикларини “очиб” бериши ва етакчилик характери билан ҳам алоҳида ўрин эгаллаган.
Ҳозирда ҳужумчининг “Ал-Иттиҳод” билан амалдаги шартномаси 2026 йил 30 июнга қадар белгиланган. Шу билан бирга, аввалроқ саудияликлар Бенземага 2028 йил ёзигача амал қиладиган янги битим таклиф қилгани ҳақида ҳам хабарлар тарқалган эди. Бундан ташқари, Каримни катта футболга етаклаган “Лион” клуби ҳам уни Франция чемпионатига қайтиб, жамоага ёрдам беришга чорлаётгани айтилмоқда.
Қисқаси, Бенземани олдинда бир нечта йўл кутяпти: Саудияда қолиб, келишувни узайтиришми, Европага қайтишми ёки фаолиятидан кейин Мадридга — “Реал”нинг расмий элчиси сифатида қайта келишми. Бир нарса аниқ: Карим қаерда бўлмасин, унинг номи “Реал” тарихидаги энг ёрқин саҳифалардан бири бўлиб қолаверади.