"Манчестер Сити" — "Ньюкасл" баҳси: тахминий таркиблар билан танишинг

Манчестерда бу тун алоҳида кайфият бор — Англия Лига кубоги доирасида “Манчестер Сити” ўз майдонида “Ньюкасл”ни қабул қилади. Соат 01:00 да старт оладиган ушбу тўқнашув олдидан Sports Mole ҳамда клубни яқиндан ёритиб бораётган нашрлар томонидан тахминий таркиблар эълон қилинди. Ва энг ёқимли хабар — Абдуқодир Ҳусанов асосий таркибда кутиляпти.

Гвардиола яна Ҳусановга ишоняпти

Сўнгги икки учрашувда ҳам стартдан майдонга тушган ўзбекистонлик ҳимоячи бу сафар ҳам ишончни сақлаб қолди. Бу — тасодиф эмас. Ҳимояда жароҳатлар, ротация ва график зичлиги фонида Пеп Гвардиола Ҳусановни барқарор ва ишончли вариант сифатида кўряпти. Ва бугунги кубок баҳсида ҳам у марказда жамоа тартибини ушлаб туриши керак бўлади.

Тахминий таркиб (Sports Mole ва клуб нашрлари бўйича):

“Манчестер Сити”

• Траффорд — Нуньес, Ҳусанов, Аллейн, О’Райли;
• Родри, Гонсалес;
• Черки, Семеньо, Доку;
• Холанд.

Ушбу схемада ҳам Ҳусанов марказий ҳимояда Аллейн билан бирга жойлашган. Бу дуэт ҳозирги ҳолатда Гвардиоланинг энг ишончли “қалқони”га айланиб улгурди.

Нима учун бу ўйин муҳим?

“Ньюкасл” — енгил рақиб эмас. Улар босимли ўйнайди, тезкор ҳужумлар билан рақибни хатога мажбур қилади. Бундай жамоага қарши эса ҳимоянинг барқарорлиги ҳал қилувчи омилга айланади. Шу ерда Ҳусановнинг тезлиги, жисмоний кучи ва позицияни тўғри танлаши жуда қўл келади.

Ҳоланд олдинда гол излайди, Доку ва Семеньо қанотларда, Черки эса марказда портлаш ясашга тайёр, Родри эса ўйинни боғлаб туради. Лекин барчаси ҳимоя орқада ишончли бўлмаса, хавфга айланади. Шунинг учун бугунги кечада Абдуқодирнинг ҳар бир тўпни тозалаб чиқариши, ҳар бир дуэлни ютиши олтинга тенг.

Қисқаси, бу — навбатдаги синов, навбатдаги имконият. Ҳусанов учун эса бу шунчаки ўйин эмас — бу “мен бу ерга бекор келмаганман” деб айтиш учун яна бир шанс. Манчестер осмонида ўзбек ҳимоячисининг номи яна баландроқ эшитилиши мумкин.