Мирзиёев армияни технологик янгилаш бўйича муҳим вазифаларни белгилади

Ўзбекистон президенти раислигида Хавфсизлик кенгашининг мамлакат мудофаа қобилиятини тубдан юксалтиришга бағишланган кенгайтирилган мажлиси бўлиб ўтди. Давлатимиз раҳбари соҳадаги ютуқларни сарҳисоб қилиш билан бирга, замонавий хавф-хатарларга қарши туриш учун қуролли кучларни рақамли технологиялар ва сунъий интеллект асосида трансформация қилиш зарурлигини таъкидлади.

Замонавий уруш ва янги ҳарбий стратегия

Йиғилишда бугунги кунда минтақавий тўқнашувларнинг кўлами кенгайиб, халқаро ҳуқуқ меъёрлари заифлашаётгани қайд этилди. Олий бош қўмондон анъанавий жанг услублари ўтмишда қолаётганини алоҳида қайд этди:

• Технологик устуворлик: Эндиликда ғалаба аскарлар сони ёки танклар билан эмас, балки сунъий интеллект, масофавий бошқариладиган робот тизимлари ва кибертехнологиялар орқали таъминланади.

• Проактив режим: Ҳар бир тизим хавфларни олдиндан сезиш ва уларга тезкор жавоб қайтариш учун «проактив иш режими»га ўтиши шарт.

• Доктринани янгилаш: Вазият ўзгараётгани сабабли 1997 йилдаги Миллий хавфсизлик концепцияси ва саккиз йил олдинги Мудофаа доктринасини қайта кўриб чиқиш топширилди. Янги ҳужжатда Ўзбекистоннинг ҳарбий блокларга қўшилмаслик мақоми сақлаб қолинади.

«Муддатли хизмат – муваффақият йўли»

Президент армияни ёшлар учун нафақат жисмоний чиниқиш, балки келажакдаги касбий ривожланиш майдонига айлантириш бўйича инқилобий янгиликларни эълон қилди:

• Касб сертификати: Аскарлар 3-6 ойлик дастурлар асосида касбга ўқитилади ва сертификат олади.

• IT-таълим: Ҳар йили 5 минг аскар «Бир миллион дастурчи» ва сунъий интеллект лойиҳалари доирасида малака оширади.

• Таълимдаги имтиёзлар: Хизмат даврида олийгоҳга имтиҳон топшириб, талаба бўлиш имкони яратилади. Олийгоҳга кирган собиқ аскарларга фоизсиз таълим кредитлари берилиб, чет тили сертификати харажатлари қопланади.

• Ишга жойлашиш: Давлат хизматига киришда 10 фоизлик имтиёз берилади, тадбиркорлик кредитининг 6 фоизи давлат томонидан тўланади.

«Бир сўз билан айтганда, “муддатли ҳарбий хизматни ўташ – ёшлар учун муваффақият йўли”га айланиши керак, – деди президент.

«Минтақавий ва глобал вазиятни доимий таҳлил қилиб бориш, миллий армиямизнинг салоҳиятини мустаҳкамлаш – бугунги кун талаби. Ўзбекистон армияси халқ ҳимоясига доимо тайёр туриши, бунинг учун тезкор, юқори технологияли, янги жанг шароитларига мос бўлиши керак», – деди президент.

Ҳарбий хизматчиларни ижтимоий қўллаб-қувватлаш

Давлат раҳбари ватан ҳимоячиларининг меҳнатини қадрлаш мақсадида 1 апрелдан бошлаб маошлар оширилишини эълон қилди:

• 1 апрелдан бошлаб Мудофаа вазирлиги офицерларига кўп йиллик хизмати учун устама миқдори 2 карра оширилади. Контракт асосида хизмат қилаётган оддий аскар ва сержантларнинг ойлик маоши 10 фоизга кўпайтирилади.
• Ҳудудий мудофаа ишлари бошқармаси ва бўлимларининг ҳарбий бўлмаган хизматчиларини ойлиги бу йил 20 фоизга, келаси йили яна 50 фоизга оширилади.
• Қуролли Кучлар сафида 30 йилдан ортиқ хизмат қилган ҳарбийлар учун пенсия ҳисоблашда инобатга олинадиган ойлик миқдори 75 фоиздан 100 фоизга етказилади.
• Шунингдек, ҳарбийлар учун уй-жой қурилиши кенгайтирилади ва пенсия таъминоти бўйича янги қонун лойиҳаси ишлаб чиқилади.

«Ҳарбий хизматчилар меҳнатини қадрлаш, уларнинг оила аъзолари ва ҳарбий пенсионерларни ижтимоий ҳимоя қилиш доимо диққат-эътиборимиз марказида бўлиши зарур, – деди давлат раҳбари ва бу борада катта янгиликларни эълон қилди.

«Умуман, янги доктрина армияни технологик янгилаш ва илғор ҳарбий ечимларни жорий этиш учун асос бўлиб хизмат қилиши керак», – деди президент.

Маънавият ва спорт: Янгича ёндашув

Ҳарбийларнинг маънавий оламини бойитиш мақсадида барча қисмларга жами 1 миллион нусха бадиий китоб етказилади. Китобхонлик танлови ғолибларининг хизмат муддати бир ойга қисқартириб берилади. Спорт йўналишида эса анъанавий мусобақалар қаторига киберспорт, дрон ва робот технологиялари бўйича турнирлар қўшилди.

Давлатимиз раҳбари йиғилиш якунида барча ватан ҳимоячиларини Қуролли Кучлар ташкил этилганининг 34 йиллиги билан самимий табриклади.

«Сизларнинг жасоратингиз, қасамёдга садоқатингиз, эл-юрт ҳимояси йўлидаги фидойилигингиз билан бутун халқимиз фахрланади. Гўзал юртимизда тинчлик-осойишталик ва ҳамжиҳатлик доимо ҳукм сурсин, жонажон Ватанимиз янада мустаҳкам ва барқарор бўлсин!»– деди давлат раҳбари.

Сизнингча, армияда жорий этилаётган касбга ўқитиш тизими ёшларнинг келажагига қандай таъсир кўрсатади?