Компаниялар талабалар контрактини тўлаб, битиргач ишга олиши мумкин
Ўзбекистонда иш берувчиларга талабаларнинг ўқиш харажатларини қоплаб бериш ва университетни тугатгач уларни ишга қабул қилиш имконини берадиган янги ҳамкорлик тартиби жорий этилди. Вазирлар Маҳкамаси олий таълим муассасалари, талабалар ва корхоналар ўртасидаги ҳамкорлик механизмини тасдиқлади.
Янги тартиб бакалавриатнинг 2-курсидан бошлаб таълим олаётган талабаларга тааллуқли. Компания талабани “ҳомийлик”ка олиб, унинг контракт пулини тўлайди, битирувдан кейин эса уни иш билан таъминлайди. Бунинг учун талаба, ОТМ ва буюртмачи ўртасида уч томонлама шартнома тузилади.
Буюртмачи сифатида вазирлик ва идоралар, шунингдек ходимлари сони 50 нафардан кўп бўлган компаниялар ёки қиймати камида 1 млн долларлик инвестиция лойиҳасига эга ташкилотлар қатнашиши мумкин.
Дастурда иштирок этиш учун талаба 20 сентябрга қадар ўз ОТМига электрон ариза топшириб, ўқишдаги кўрсаткичлари бўйича маълумотномани илова қилади. Минимал GPA талаби — 3.
Саралаш жараёни 15 октябргача суҳбат шаклида ўтказилади. Ҳал қилувчи мезон сифатида компания вакилининг хулосаси олинади. Шартнома имзолаб, ўқишни муваффақиятли якунлаган талабалар буюртмачи компанияга ишга қабул қилинади.