“Қамчиқ”да биринчи қор ёғди
4 ноябрь куни эрталаб “Қамчиқ” довонининг юқори қисмида майин қор ёға бошлади, деб хабар берди Фавқулодда вазиятлар вазирлиги.
Маълумотларга кўра, ҳозирда ФВВ, ЙПХ ва “Қамчиқавтойўл” хизматлари ҳамкорликда йўлни қордан тозалаш, музламаларнинг ҳосил бўлишининг олдини олиш ва қум-туз аралашмасини сепиш ишларини амалга оширмоқда.
Қутқарувчилар ҳайдовчиларга ёрдам кўрсатиш, хавфсизликни таъминлаш ва йўлда қолган транспорт воситаларини эвакуация қилиш ишларини давом эттирмоқда.
ФВВ ҳайдовчиларга мурожаат қилиб, довон ҳудудида ҳаракатланишда барча хавфсизлик қоидаларига риоя қилиш, ортиқча тезлик ва хавфли манёврлардан тийилишни сўради.
Вазирлик тарқатган видеоларда қор майин ёғса-да, довонни оқ қоплами қоплагани кўринади. Шу билан бирга, ижтимоий тармоқларда Жиззах, Қашқадарё ва бошқа тоғли ҳудудларда ҳам қор ёғаётгани тасвирланган лавҳалар тарқалмоқда.
Ҳозирча қор нафаси Тошкентга етиб келмаган, аммо кўпгина ҳудудларда қишнинг илк белгиси сезила бошлади.