Вернер жамоасининг "Штутгарт" устидан қозонган ғалабаси ҳақида гапирди
"РБ Лейпциг" Бундеслигада пешқадамлар сафида қолмоқда ва 1 ноябрь куни мусобақа жадвалидаги рақиби "Штутгарт"ни мағлуб этди. 9-тур учрашуви 3:1 ҳисобида якунланди.
"Жамоага раҳмат. Биз сабрли бўлдик ва рақибга кўп жой қолдирмадик. Яхши ўйин кўрсатдик ва имкониятларимиздан самарали фойдаландик. Жамоамизда ёш, ғайратли футболчилар ва тажрибали ўйинчилар бор.
Уларнинг уйғунлиги ўйиндаги муваффақиятимизнинг асосидир. Шу руҳда имкони борича узоқ давом этишимиз керак", деди ғолиб жамоа бош мураббийи Оле Вернер Sky телеканалига берган интервьюсида.
Ушбу ўйиндан сўнг "Штутгарт" 18 очко билан тўртинчи ўринда қолди. "РБ Лейпциг" эса кетма-кет 8 ўйинда мағлубиятга учрамаган ҳолда 22 очко билан иккинчи ўринда жойлашган.
Жадвалнинг биринчи поғонасида эса 27 очкога эга "Бавария" жойлашган.