Ўзбекистон дунёдаги энг арзон интернетга яқинлашди
Ўзбекистон интернет нархлари бўйича дунё миқёсида арзон давлатлар қаторига кирди. Россиянинг Федерал давлат статистика хизмати маълумотлари ва турли мамлакатлардан йиғилган рақамларга таянадиган РИА Новости ҳисоботига кўра, мамлакатимизда уй интернети ойига ўртача 11,7 доллар атрофида турмоқда.
Бу кўрсаткич Ўзбекистонни интернети арзон мамлакатлар рўйхатида юқори ўринлардан жойлашишига замин яратди. Қиёс учун, Ҳиндистонда уй интернети нархи энг паст бўлиб, ойига 7,7 доллардан ҳисобланади. Руминия эса 9,8 доллар билан кучли учликни ёпади. Россия интернет арзонлиги бўйича йирик иқтисодиётлар орасида иккинчи ўринни эгаллаб, ойига ўртача 8,7 доллар тўланиши қайд этилган.
Шунингдек, энг арзон интернет хизматлари қаторидан Хитой (11,3 доллар), Ўзбекистон (11,5 доллар), Қозоғистон (12,7 доллар), Туркия (13,8 доллар), Болгария (14,6 доллар) ва Литва (16,5 доллар) каби мамлакатлар ҳам ўрин олган.
Бундан ташқари, Польша (17,2 доллар), Грузия (17,4 доллар), Таиланд (18,4 доллар), Арманистон (19,1 доллар) ва Латвия (19,7 доллар) каби давлатлар ҳам интернети арзон бўлган топ-15ликни якунлайди.
Шу билан бирга, дунёда интернет нархлари энг қиммат бўлган давлатлар ҳам аниқланди. АҚШ (72,1 доллар), Канада (61,7 доллар) ва Люксембург (59,1 доллар) рўйхатнинг юқори қисмида турибди. Улардан кейин Бельгия (56,9 доллар), Ирландия (55,1 доллар), Австралия (53,6 доллар), Германия (50,7 доллар), Нидерландия (50,6 доллар), Португалия (43 доллар) ва Жанубий Африка (42,3 доллар) каби мамлакатлар жой олган.
Энг қиммат интернетга эга 15 та давлат қаторига, шунингдек, Буюк Британия (42,1 доллар), Словения (40,8 доллар), Австрия ва Швеция (39,9 доллардан) ҳамда Франция (35,3 доллар) ҳам киритилган.
Бироқ, интернет нархи фақатгина абсолют қиймати билан эмас, балки аҳолининг даромадидан қай даражада улуш олиши билан ҳам баҳоланади. Масалан, Бразилияда уй интернети аҳоли ўртача даромадининг 4,1 фоизини ташкил этади, Мексикада бу кўрсаткич 3,8 фоиз, Аргентинада эса 3,65 фоизни ташкил этади. Энг паст улуш эса Россияда (0,67 фоиз), Руминияда (0,9 фоиз) ва Жанубий Кореяда (0,97 фоиз) қайд этилган.
Мутахассислар фикрича, Ўзбекистонда интернет нархларининг арзонлиги рақамли хизматлардан фойдаланиш имкониятини кенгайтириб, мамлакатда рақамли иқтисодиётни ривожлантиришга хизмат қилмоқда. Бу эса таълим, бизнес ва ахборот алмашинувини янада самарали қилиш учун муҳим омил сифатида қайд этилмоқда.