Гвардиола янги мавсумда нималар кутаётганини маълум қилди
Англия Премьер-лигаси тарихида сўнгги ўн йилликда энг муваффақиятли клублардан бири сифатида эътироф этилаётган “Манчестер Сити” жамоаси янги мавсум арафасида жиддий тайёргарлик ишларини олиб бормоқда. Жамоанинг бош мураббийи Хосеп Гвардиола эса ўз шогирдларидан нималар кутаётгани ва янги чемпионатда қайси жиҳатларга эътибор қаратиши ҳақида фикрларини баҳам кўрди.
“Шаҳарликлар” кетма-кет тўрт йил давомида мамлакат чемпиони сифатида майдонга тушиб келди. Бироқ ўтган мавсумда уларнинг ҳукмронлигига нуқта қўйилди — асосий соврин “Ливерпуль” қўлига ўтди ва “Сити” мусобақани учинчи ўрин билан якунлади. Бу ҳолат, табиийки, клуб ва унинг мухлислари учун ўзига хос сигнал бўлди.
— Менинг кутаётганим жуда аниқ, — деди Гвардиола. — Биринчи турларда зафар қучиш, шундан сўнг жамоанинг ўзига ишончини ошириш ва кейинги учрашувларга янада кучли руҳ билан кириш. Бунинг учун бор имкониятларимиз, барча ресурсларимиз ва тажрибамизни ишга соламиз.
Машҳур мураббийнинг таъкидлашича, ҳар бир мавсум маълум маънода аввалги йилларга ўхшайди. Чунки клуб 10 йил аввал йўлга қўйган тизимли ишларини изчил давом эттирмоқда. Шунга қарамай, янги чемпионатда мақсадлар ҳар доим юқорироқ белгиланади.
— Янги мавсумдаги ниятимиз — ўтган йилда эришган натижалардан юқорисини кўрсатиш. Лекин чемпионат бошланишидан олдин қай даражада ютуқларга эришишимизни аниқ айтиш қийин. Футболда олдиндан ҳамма нарсани ҳисоблаб бўлмайди, — дея қўшимча қилди “Сити” устози.
“Манчестер Сити” учун янги мавсумдаги илк синов 16 август куни бўлиб ўтади. Жамоа сафарда “Вулверхэмптон”га қарши баҳс олиб боради. Бу учрашув клуб учун нафақат очколар жамғармасини бошлаб бериш, балки янги мавсум кайфиятини белгилаб олишда ҳам муҳим аҳамиятга эга бўлади.
Мухлислар эса жамоасидан яна юқори даражадаги ўйин, таъсирли комбинациялар ва чемпионлик учун олиб бориладиган курашда максимал кучни сафарбар қилишни кутишмоқда. Гвардиоланинг ўз ишига бўлган иштиёқи ва тажрибаси эса бу мақсадларга етиш йўлида асосий омиллардан бири бўлиб қолиши шубҳасиз.