Абдуқодир Ҳусанов ўндан зиёд клуб ўртасида талаш бўлмоқда. Бироқ кўпчиликни Англия ва Испания чемпионатлари – “Манчестер Сити” ва “Реал” ўртасида ўзбек футболчиси учун кечаётган рақобат қизиқтириб
турибди.
Чунки Франция, Италия, Германия, Англия, Испания ва Туркиянинг қолган клублари молиявий имкониятлар бўйича бу клубларга бас кела олмайди.
Вазиятни кузатиб бораётган beritarealmadrid.com сайти Абдуқодир Ҳусанов атрофида юзага келган қизғин вазиятни таҳлил қилди.
Ўзбек футболчиси ҳамманинг диққат марказида, “Ланс” эса, унинг трансфери учун нархни мунтазам оширмоқда. Айни пайтда “Реал Мадрид” ва “Манчестер Сити” 20 ёшли марказий ҳимоячини қўлга киритиш учун кураш олиб боряпти.
“Реал”нинг Абдуқодир Ҳусанов учун курашга қўшилгани ҳақидаги хабар жуда тез тарқалди ва катта шов-шувни келтириб чиқарди. Мутахассисларнинг таъкидлашича, ўзбек футболчиси мадридликларнинг ҳимоя чизиғини кучайтириш учун жиддий номзод.
Кейинги бир неча мавсум давомида “Реал” орқа чизиқда жароҳатлар билан боғлиқ давомли муаммоларга дуч келмоқда. Шу боис, клуб Абдуқодир Ҳусановдан ташқари Испания пойтахтида Кастелло Лукеба, Витор Рейс ва Эмерик Лапорт сингари ҳимоячиларни ҳам кутяпти.
Ҳусанов Франция чемпионатида “Ланс” сафидаги ажойиб ўйинлари билан ҳамманинг эътиборини қозониб келмоқда. 20 ёшли легионер ўзининг шиддатли ва тартибли ўйин услуби билан гранд клублар назарига тушди.
“Манчестер Сити” “ов” бошлади“Реал Мадрид” Ҳусанов учун ягона даъвогар, деган хаёлга бориб адашманг. Ёш истеъдодларни фаол тарзда ўз сафига жалб этиб келадиган “Манчестер Сити” ҳам ўзбек футболчисини олиш учун курашмоқда.
“Сити”нинг ўзбек футболчисига қизиқиши ортиб бораётгани “Реал”га босимни кучайтириб юборибди ва мадридликлар олдига тезроқ ва аниқ ҳаракат қилиш шартини кўндаланг қўймоқда.
Бу икки гигант клубдан ташқари, “Ньюкасл Юнайтед” ҳам ўйинчи олиш бўйича мақсадли ҳаракатларни амалга оширмоқда. Анчадан бери қизиқиш билдириб келган “Тоттенхэм Хотспур” эса, ҳимоячининг нархи кўтарила бошлагач, секин ортга чекинаётгани сезилиб қолди.
Ҳусанов фантастик нархга кетадиХаридорларнинг турнақатор навбатда тургани Абдуқодирнинг трансфер суммаси кескин ошишига сабаб бўляпти. The Athletic нашрининг ёзишича, “Ланс” ўз кашфиётини арзон сотмоқчи эмас.
Бугунги кунда францияликлар трансфер учун 40 миллион евродан зиёдроқ бадал пули талаб қилаётгани айтилмоқда. Бу ёш ўйинчи учун фантастик нарх.
Суперагент Жорже Мендешга Ҳусановнинг савдосидан имкон қадар ҳар томонлама манфаатли ечим топиш вазифаси юклатилган. Португалиялик мутахассис футбол оламидаги репутациясидан фойдаланиб, ўзбек футболчиси трансферида бош ролни ўйнамоқда.
“Реал” Ҳусановни қачон олмоқчи?Ҳусановга турли клубларнинг қизиқиши ошиб бораётганига қарамай, “Реал Мадрид” шошилинч қарорларни қабул қилмоқчи эмас. “Қироллик клуби” қишда трансферларни амалга оширмаслигини маълум қилиб бўлган.
Ўтган йили мадридликлар худди шу тарзда Лекин Йорони қўлдан чиқарган эди.
“Реал” марказий ҳимоячига эҳтиёж борлигини маълум қилган, лекин январь ойида янги ўйинчи олиш учун катта қадам ташланмайди. Гарчи мадридликлар Ҳусанов вакиллари билан алоқа ўрнатган бўлса-да, бу трансферни ёзда амалга оширмоқчига ўхшайди.
“Реал” фаолиятини ёритиб бораётган beritarealmadrid.com сайтининг юқоридаги маълумотларига қўшимча тарзда шуни маълум қилиш керакки, Абдуқодир Ҳусанов катта эҳтимол билан бошқа клубга насиб қилади.
Чунки машҳур инсайдер Фабрицио Романо “Манчестер Сити” мадридликлардан фарқли равишда Абдуқодир Ҳусановни январь ойининг ўзидаёқ трансфер қилишга қарор қилгани ва томонлар ўртасидаги музокаралар ижобий якунланишга яқин эканини маълум қилди.
Демак, Абдуқодир Ҳусанов атрофида юз бераётган жараёнларни кузатишда давом этамиз. Тез орада легионеримиз фаолиятини қайси жамоада давом эттириши ўз тасдиғини топади.
