Қишки трансфер бозорида Абдуқодир Ҳусанов учун кураш қизиб бормоқда. Айни пайтда 20 ёшли марказий ҳимоячига “топ-5” чемпионатларнинг барчасидан бир нечтадан харидор бор ва бу даъвогарлар сафи кескин ошиб
бормоқда.
Айниқса, “Пари Сен-Жермен”, “Манчестер Сити” ва “Реал” каби ўз мамлакатлари чемпионларининг ўзбек футболчисини олиш бўйича амалий ҳаракатларга ўтгани барча эътиборини ўзига тортмоқда.
Бир сўз билан айтганда, Абдуқодир Ҳусановнинг қайси клубга кўчиб ўтиши, нафақат ўзбекистонлик мухлислар, балки бошқа давлатлардаги футбол ишқибозларини ҳам қизиқтириб қўйган.
Франция футболи ёритиб келаётган манбалардан бири foot-sur7.fr сайти “Ланс” ўз кашфиётига бўлаётган қизиқишнинг ортиб бориши ортидан Ҳусанов учун талаб қилаётган нархни кўтаргани ҳақида хабар тарқатди.
Аслини олганда, “Ланс” бюджетдаги камомадларни ёпиш учун бир неча футболчиларини сотиб юборишга қарор қилган. Франция чемпионатида “Ланс” ҳимояси энг кучли жамоа ҳисобланади. Даъвогарлар эса, “Ланс”дан дарвоза дахлсизлигини сақлашда жонбозлик кўрсатаётган уч футболчи – дарвозабон Брис Самба, Абдуқодир Ҳусанов ва Кевин Дансони сўраяпти.
-
Брис Самба кетади. Абдуқодир Ҳусанов ҳам кетади. Айниқса, Абдуқодирнинг кетиши унга бўладиган таклиф клубнинг моливий манфаатларига мослигига боғлиқ. Спорт ва иқтисодий мувозанат бир бирига тўғри келиши керак, - деди “Ланс” бош директори Пьер Дреосси DAZN манбасига берган интервьюсида.
Ўзбекистон миллий терма жамоаси ўйинчиси Абдуқодир Ҳусановнинг “Ланс” билан амалдаги шартномаси 2027 йилнинг 30 июнигача тузилган. “Ланс” ўз марказий ҳимоячисини қўйиб юборишга тайёрлигини билдирганидан кейин харидорлар кўпайиб кетди.
-
Foot Mercato нашри Уилл Стилл шогирдига Европанинг бир неча клублари жиддий қизиқиш билдираётганини ёзди. ПСЖ Ҳусановни январда олмоқчи. Журналист Санти Ауна курашга “Реал” қўшилгани ва футболчининг вакиллари билан алоқа ўрнатгани ҳақида маълумот тарқатди.
“Ньюкасл” ва “Манчестер Сити”нинг Ҳусановни олишга уриниши анча жиддий масала даражасига кўтарилди ва бу клублар раҳбариятлари ҳам марказий ҳимоячининг агентлари, хусусан отаси Ҳикматжон Ҳошимов билан учрашув ўтказди.
“Ланс” бошида 20 ёшли ҳимоячисини 25-30 миллион еврога сотиб юборишни умид қилаётган эди. Энди ўйинчи учун курашга бадавлат клублар қўшилганини инобатга олиб, Ҳусановнинг трансферидан 40 миллион евро ишлаб олишга умид қилмоқда, - деб ёзди foot-sur7.fr сайти эксперт Жан Люк.
Эслатиб ўтамиз, “Ланс” 2023 йилнинг ёзида Абдуқодир Ҳусановни Беларуснинг “Энергетик-БГУ” жамоасидан трансфер қилиш учун атиги 100 минг евро сарфлаган эди.
